Aferak, apirilak 14

Aferak programaren 4. edizioa apirilaren 14an izango dugu lehen saioa. Bidarte Udaltegian Maite Sarasola, Asier Galarza, Paule Loizaga eta Ibai Amillategi izango ditugu, 19:00etan. Animatu, bertan egongo gara zuen zain! Aforoa kontrolatzeko sarrerak hemen egongo diren eskuragarri:

-Berbaizu Euskara Elkartean
-Deustuko Herriko Tabernan

Plazara!

Enare Muniategiren kolaborazioa Bertsolari aldizkariko zortziko handia atalean

Gazteok salto egin behar dugu, eta ahal dala salto plazara. Hamazortzi eta hogeita bost urte arteko gazteok tabula rasa bat daukagu esku artean, nahi duguna eta nahi dugun moduan egiteko aukera, antza 2020ak kendutakoa 2021ak bueltan ekarri nahi digu, eta bertan behera geratu zena indarrez dator. Bueno, optimistegiak ere ez gaitezen izan… nahi duguna eta nahi dugun moduan edo…

“ding!” jo du telefonoak tinderreko match bat izango balitz legez, baina ez, ez da gazte ikaragarri bat nire argazkiak gustatu zaizkiola adierazten, email bat da, eta match batek baino ilusio handiagoa egin dit. Horrela dio emailak: badator plazara! Ekimena, eskualde bakoitzean saio bat, antolatzeko ardura zuena da; animo! Oilo ipurdi azala ere jarri zait, match egin dut, baina, bizitzarekin.

“ding!” batek bueltan ekarri du ilusioa bertso eskolara, antolatzea eta kantatzea, gaiak prestatzea, grabatzea, segurtasun neurriak mantentzea, egin behar dena egiteko prest kantatzeko eta entzuteko aukera izatearren, berriz ere bertso artean elkartzearren.

Baina “ding!”ak ametsetara eroan nauen bezala “dang!” baten hankak lurrean jarri dizkit berriro. Tabula rasa zuriegi bat ez al dugu aurrean? Nori eta noiz kantatu? Ilusio handia eta gogoa sobran dugun arren, noizko lortuko dugu zeozer antolatzea? Zenbakiak eta neurriak gora, eta herriak gorri; giro beroegia neguko hotzerako, ez ala?

Galderak airean daude eta hoba geu ere “ding!” horrekin batera hegaz joan eta ilusioa eta gogoa airean mantendu.

Urte barrian sartu barritan

Enare Muniategiren kolaborazioa Bertsolari aldizkariko zortziko handia atalean

Gutxi batuko ginela eta, Gabonak xumeagoak izango zirela eta, beste hainbeste notiziren ostean, batzuk pozarren aurten ez genuelako horrenbeste jango, beste asko pozik inor aguantatu behar ez delako, eta beste asko penaz poteoa seietan amaitu delako. Denoi, loditu zaretenoi zein loteria tokatu zaizuenoi, ospatu duzuenoi eta hasarratu zaretenoi, urte barria umorez hasteko idatzitako sortatxoa hemen:

Urte barrian sartu barritan

natorkizue kantari,

20a oraindik ez dogu ahaztu

21ari adi.

Bertso barriak jartzera noa

Gabonen panoramari,

iaz Jesusen ordez jaio zan

Covid hemeretziari.

Euren etxean geratu dira

osaba eta izeko,

baita aitxitxe-amuma eta

hiru loba oinordeko.

Mahaiaren bueltan alkartu gara

familiko lau, etxeko

neurri guztiak errespetatuz

neurririk barik jateko.

Bi asten bueltan lau ospakizun,

pasatzea da, hau da lar!

“Etxean trankil egon gura dot”

pentsatuz hainbeste bidar.

Ohitura barri asko ondo dauz

albora itziz hainbeste zahar,

ze barriakaz koinatua be

ez dogu aguanta behar.

Lehenago zana hamar polboroi

zein bi litro intxor-salsa,

ta afal ostean etxekoekin

kantu zahar eta dantza.

Aurten ahora esperantzagaz

hamabigarren mahatsa,

urte barrian musu emotea

ez daiten izan hain gatza.

Gabon barriak asmatu eta

ondo pasatzen igarri,

begietara sakon begira

egon garenez alkarri,

gauza bakarra eskatu gura

deutsut zuri, urte barri:

Triste denak eroatea

ta besarkadak ekarri.

Euskaraldian bertsotan

Gure Elkarteko bertsolariek Ellacuria Zurbaran Institutuan agurtu dute aurtengo Euskaraldia.